Wahyu 10

10:1 Nainappa uwita séddi malaéka' poré iya laingngé nonno polé ri surugaé. Risalipuriwi sibawa ellung, enrengngé séuwa tarawu mattemmuiwi ulunna. Tappana maccahaya pada-pada mata essoé, sibawa ajéna pada-pada alliri apié.
10:2 Ri limanna engka séddi kitta lulung baiccu iya tattimpa'é. Ajé ataunna makkella ri tasi'é, sibawa ajé abéyona makkella ri pottanangngé.
10:3 Nainappa gora sibawa sadda battowa pada-pada sining singaé iya mattengngangngé mowang. Puranana gora iyaro malaéka'é, iya pitu guttué mappébalini sibawa sadda maddalenrung.
10:4 Massaddanna iya pitu guttuéro, maéloka mokii, iyakiya méngkalingaka séuwa sadda polé ri surugaé makkeda, "Rahasiyakangngi aga iya napowadaé iya pitu guttuéro; aja' muwokii!"
10:5 Nainappa malaéka' iya uwitaé makkella ri tasi'é sibawa ri pottanangngéro makkai lima ataunna ménré' ri langié.
10:6 Mattanroi ri laleng asenna Allataala iya tuwoé mannennungeng, iya pancajiyéngngi langié, linoé sibawa tasi'é enrengngé sininna séuwa-séuwaé iya engkaé ri lalenna. Makkedai iyaro malaéka'é, "Dé'na matu naripasoro wettunna!
10:7 Iyakiya rékko malaéka' mapitué seppungngi tarompé'na, Allataala pakajajiyangngi matu rancana rahasiya-Na, pada-pada pura riyabbirittangngé lao ri ata-atan-Na, iyanaritu sining nabié."
10:8 Nainappa sadda iya puraé uwéngkalinga polé ri surugaéro, mabbicarasi lao ri iyya. Makkedai, "Laono malai kitta lulung iya tattimpa'é ri limanna malaéka' iya makkellaé ri tasi'é sibawa ri pottanangngéro."
10:9 Naulaona ri malaéka'éro sibawa uwéllauwi kuwammengngi nabbéréyangngi kitta lulung baiccu'éro lao ri iyya. Makkedai, "Alani sibawa anréi iyaé. Ri laleng babuwamu mancaji mapaii matu, iyakiya ri laleng bawamu macenningngi pada-pada cani'é."
10:10 Uwalani iyaro kitta lulung baiccu'é polé ri limanna nainappa manréi. Ri bawaé rasana pada-pada cani'é, iyakiya purana uwemme, ri laleng babuwaé mancaji mapaii.
10:11 Nainappa riparéntakka, "Pallebbangngi siseppa birittanna Allataala passalenna bangsa-bangsaé, sining wanuwaé, sining basaé, enrengngé sining arungngé."