Mazmur 97

97:1 PUWANGNGE iyanaritu Arung! Sitinajai marennu linoé, sibawa pulo-puloé mariyo-riyo.
97:2 Riyattulilingiwi ellung sibawa pettang; adélékengngé sibawa hukkungngé iyanaritu tettongenna apparéntan-Na.
97:3 Makkalolo apié ri yolo-Na, mangurengngi balié ri mattulilin-Na.
97:4 Billa'na tajangiwi linoé, ténré linoé mitai.
97:5 Maccolo sining bulué pada-pada lilingngé ri yolona PUWANGNGE, ri yolona PUWANGNGE, makuwasaéngngi sininna linoé.
97:6 Nabbirittangngi langié adéléken-Na, sibawa sininna bangsaé mitai alebbiren-Na.
97:7 Sininna tau iya sompaéngngi barahalaé ripakasirii matu, iya mabbangkakengngéngngi barab-barang dé'é nakkéguna; sinininna déwataé suju'i *sininna déwataé suju'i, iyaré'ga: suju'no, éh sininna déwataé!* matu ri yolona PUWANGNGE.
97:8 Masennangngi pabbanuwana Sion sibawa kota-kotana Yéhuda wettunna naéngkalinga apettunna PUWANGNGE.
97:9 Saba' Iko, oh PUWANG, panguwasana sininna linoé; maraja-Ko nacau sininna déwataé.
97:10 Eh iko iya pojiyéngngi PUWANGNGE, céccéi jaé! Saba' PUWANGNGE linrungiwi atuwonna umma'-Na, Napaleppe'i mennang polé ri akuwasan-Na tau madorakaé.
97:11 Momponi tajangngé untu' tau iya malempué atinna, sibawa ariyo-riyong untu' tau iya malempué.
97:12 Akkérennuno, éh sining tau iya malempu atié nasaba aga iya puraé napogau' PUWANGNGE, sibawa sukkuru'no lao ri Allataala iya mapaccingngé.