Mazmur 7

7:1 Watinna Daud, iya napuwélongngé untu' PUWANGNGE nasaba Kus, tau Bényamingngéro.
7:2 Oh PUWANG Allataalaku, mallinrukka ri Iko; passalama'ka sibawa leppessakka polé ri sininna tau iya lellungngékka.
7:3 Aja' narileppessang mennang pada-pada singaé luruika sibawa massarénréngekka na dé' gaga pattulukku.
7:4-5 PUWANG Allataalaku, ébara'na macéko-cékoka, kédo maja lao ri rangengngé, iyaré'ga naparogiwi balié temmakkéalasang, *naparogiwi balié temmakkéalasang: iyaré'ga: mamaséiwi tau iya gaukengngékka sibawa dé' naadélé.* ébara'na upogau'i makkuwaéro,
7:6 leppessanna rilellung sibawa ritikkeng ri balié, nainappa riyuno sibawa risalai ri tanaé.
7:7 Tokkonni ri laleng cai-Mu, oh PUWANG, éwani ajjallokenna sining balikku. Tokkonni untu' tulukka, saba' Mutuntu'i adélé'é.
7:8 Paddeppungenni bangsa-bangsaé ri mattulilim-Mu, sibawa akuwasaini mennang polé ri kadéra arajam-Mu ri surugaé. *sibawa akuwasaini ... surugaé; naullé iyaro bettuwanna. Manuru basa Ibrani: tudanno ri kadéra akkarungem-Mu ri onrong matanré iyaré'ga: lisuno ri onrong iya matanré.*
7:9 Muadélékiwi rupa tauwé; wérékka adélékeng, oh PUWANG, saba' dé' upasala.
7:10 Pappajani jana tau madorakaé sibawa pakkasse'i atinna tau makessingngé, saba' Iko Allataala iya adélé'é, iya mpellungiyéngngi atinna sibawa pikkiranna tolinoé.
7:11 Pallinrukku iyanaritu Allataala iya passalama'éngngi tau iya malempu atié.
7:12 Allataala iyanaritu Allataala iya adélé'é, iya hukkungngéngngi tungke wettu tau majaé.
7:13-14 Rékko dé' natappinra kédo-kédona mennang, sadiyai sibawa senjata iya paunoé. Nasai peddanna sibawa napaggettengngi panana, nainappa nannémbakeng pana-panana iya makkéapié.
7:15 Itai, tau majaé narancanai majaé; mébbui rancana maja sibawa pogau'i pabengnguwangngé.
7:16 Kaliwi kalebbong untu' tau laingngé, iyakiya aléna muto sempé ri lalenna.
7:17 Jaji rihukkungngi ri jana muto, sibawa risissai ri ateddekenna muto.
7:18 Sukkuru'ka lao ri PUWANGNGE nasaba adélé'i, upuwélongengngi pappojiyang untu' PUWANGNGE, Iya Pommatanré.