Mazmur 66

66:1 Untu' pamimping kor. Séuwa élong. Gora-gorano untu' Allataala, éh sininna linoé!
66:2 Akkélonno sibawa pakarajai asen-Na, pakalebbii Aléna sibawa pappoji-pojiyang.
66:3 Powadani lao ri Allataala, "Mappabengnga tongeng pangkaukem-Mu! Tunru'i balié ri Iko penno amétaureng, saba' battowa senna akuwasam-Mu.
66:4 Sininna linoé suju' sompa-Ko, makkélongngi mennang pojiwi asem-Mu."
66:5 Poléni sibawa itani pangkaukenna Allataala, mappabengnga tongeng sining winru-Na ri yelle'na tolinoé!
66:6 Napinrai tasi'é mancaji tana rakko, nalléttoiwi toriyolota sibawa mallaleng. Natamarennu nasaba pangkauken-Na.
66:7 Mapparéntai sibawa barani untu' mannennungeng. Najagaiwi bangsa-bangsaé, kuwammengngi dé' naulléi matempo tau maronta'é lao ri Aléna.
66:8 Pojiwi Allataalata, éh bangsa-bangsa, gorangngi pappojiyammu lao ri Aléna!
66:9 Purani najagai kuwammengngi tette'ki tuwo, sibawa dé' naleppessakki sempé.
66:10 Oh Allataala, Iko pura mojiki pada-pada tau patuléngngéngngi péra'é ri laleng apié.
66:11 Muleppessakki sempé ri laleng siyo-siyoé, sibawa Muwéréngngi tiwi iya matane senna'é.
66:12 Muleppessakki riléjja'-léjja' ri balié; malléttoiki lémpe sibawa api. Iyakiya makkekkuwangngé purani Mutiwi ri onrong iya macommo'é.
66:13 Tiwika matu akkarobangeng ritunu ri Bola-Mu sibawa rupaiwi jancikku lao ri Iko,
66:14 janci iya upowadaé wettukku ri laleng asussang.
66:15 Uwakkasuwiyangengngi ri Iko akkarobangeng ritunué polé ri olokolo ripilé, bémbé bimbala sibawa saping lai, rumpunna mallaso ménré ri langié.
66:16 Poléni sibawa éngkalingai, éh sininna tau mateppe'é, ucuritai matu aga napogau' Allataala ri aléku.
66:17 Purana gora méllau tulung ri Aléna; makkekkuwangngé upuwélongengngi pappoji-pojiyang untu' Aléna.
66:18 Ebara'na masennakka pikkiri'i majaé, pasti dé' namaélo PUWANGNGE méngkalingai.
66:19 Iyakiya Allataala pura méngkalingaka, najampangiwi paréllaukku.
66:20 Upojiwi Allataala saba' dé' Nasampéyangngi sempajakku, sibawa dé' nappésau mamaséika.