Mazmur 29

29:1 Mazmurna Daud. Pojiwi PUWANGNGE, éh mahlu'-mahlu' surugaé, pojiwi arajanna sibawa akuwasan-Na.
29:2 Pojiwi asenna PUWANG iya malebbié sompai Aléna sibawa paké pakéyang assompang. *sibawa paké pakéyang assompang, iyaré'ga: rékko Aléna mappaitangngi alé.*
29:3 Allataala iya marajaé magguttui ri tompo'na tasi'é, maddaremmengngi saddan-Na ri tompo'na dolangengngé.
29:4 Riyéngkalingai saddanna PUWANGNGE, pennoi akuwasang sibawa agaggang.
29:5 Naléttung aju-kajungngé saddanna PUWANGNGE, napolo aju camara Libanongngé.
29:6 Napaluppe'i Bulu Libanon pada-pada ana' sapingngé. Luppe'-luppu'i Bulu Siryon pada-pada ana' banténgngé.
29:7 Saddanna PUWANGNGE naébbui billa'é siyanré-anré.
29:8 Saddanna PUWANGNGE gottangngi padang kessi'é, PUWANGNGE gottangngi padang kessi Kadés.
29:9 Nagottangngi aju-kajung berangangngé *Nagottangngi aju-kajung berangangngé: naullé iyaro bettuwanna. Manuru basa Ibrani: mébbui mémmana jongaé.* saddanna PUWANGNGE, sibawa padduttungngi daud-daungngé ri ale'é; na umma'é ri Bolana PUWANGNGE mangobbii, "Pojiwi PUWANGNGE!"
29:10 Makuwasai PUWANGNGE ri lémpe rajaé, makuwasai selaku Arung untu' mannennungeng.
29:11 Tennapodo PUWANGNGE mabbéré awatangeng lao ri umma'-Na, sibawa mébbui mennang saléwangeng.