Mazmur 148

148:1 Pojiwi PUWANGNGE! Pojiwi PUWANGNGE, éh silise surugaé! Sininna iya monroé ri onrong matanré, pojiwi Aléna!
148:2 Pojiwi Aléna, éh sininna malaéka'na. pojiwi Aléna, éh sininna tentarana surugaé!
148:3 Pojiwi Aléna, éh mata essoé sibawa kétengngé, pojiwi Aléna, éh sining wéttowing iya mappidé-pidé!
148:4 Pojiwi Aléna, éh langi iya kaminang matanré, pojiwi Aléna, éh uwai ri yasé'na langié!
148:5 Makessingeng manengngi mennang pojiwi asenna PUWANGNGE, saba' ripancaji manengngi nasaba parénta-Na.
148:6 Napattentui onronna tungke-tungke, attetteken-Na takkennai untu' mannennungeng. *Napattentui ... mannennungeng iyaré'ga: Purani napattentu onronna mennang untu' mannennungeng, sibawa parénta untu' matteru.*
148:7 Pojiwi PUWANGNGE, éh silise linoé, éh naga-naga tasi sibawa sininna dolangeng malowangngé;
148:8 éh billa sibawa bosi ése, salju sibawa ellung, anginraja iya turusiyéngngi paréntana PUWANGNGE!
148:9 Pojiwi Aléna, éh bulu-bulu sibawa sining bulu, pong buwa-buwaé sibawa sininna ale'é;
148:10 sininna olokolo ripiyaraé sibawa olokolo maliyaé, sininna olokolo makkalolo'é sibawa manu'-manu'é!
148:11 Pojiwi Aléna, éh arung-ngarungngé sibawa sininna bangsaé, sining arungngé sibawa sininna panguwasaé;
148:12 sininna kalloloé sibawa ana'daraé, tomatowaé sibawa tau maloloé.
148:13 Makessingeng manengngi mennang pojiwi asenna PUWANGNGE, saba' lebbi marajai asen-Na naiya sininna asengngé; arajan-Na naliwengngi langié sibawa linoé.
148:14 Purani napéwatangi bangsa-Na, angkanna ripoji-poji ri umma'-Na, Israélié, umma Napojiyé. Pojiwi PUWANGNGE!