Mazmur 101

101:1 Mazmurna Daud. Maéloka makkélong passalenna atinulurengngé sibawa adélékengngé, untu' alé-Mu, oh PUWANG, élong pappojiyakku!
101:2 Maéloka puriatiwi atuwo-tuwong iya dé'é cellana. Uppanna polé-Ko ri iyya? Maéloka tuwo mapaccing ri bolaku,
101:3 dé' matu uleppessangngi jaé. Ucéccé pangkaukenna tau massakkaé, sibawa dé' umaélo makkéurusang sibawa mennang.
101:4 Dé' umaélo kédo macéko-céko *Dé' umaélo kédo macéko-céko, iyaré'ga: mabélaiwi tau iya macéko-cékoé.* sibawa dé' umaccowé ri laleng jaé. *dé' umaccowé ri laleng jaé, iyaré'ga: mappunnai urusang sibawa tau majaé.*
101:5 Tau mappétenna'é sibawa mammekko-mekko upabbinasai matu. Tau matempoé sibawa matanré atié dé' matu uleppessangngi.
101:6 Upoji tau iya matinulué lao ri Allataala; weddingngi mennang monro ri bolaku. Tau iya tuwoé temmakkécella wedding tumanika.
101:7 Topabbengnguwangngé dé' nawedding monro ri bolaku; pabbelléngngé dé' matu natahang ri yoloku.
101:8 Polé ri essoé lao ri essoé maéloka paccappui sining tau majaé ri wanuwaéwé. Sininna tau iya pogau'é ja upallennye'i matu ri Kotana PUWANGNGE.