Ayub 23

23:1-2 Iyakiya mappébaliwi Ayub, "Maronta'ka sibawa maddaréké lao ri Allataala; dé' uwulléi tahangngi addarékéngngé.
23:3 Ebara'na uwissengngi kékai onrong Naonroiyé, kuwammengngi weddikka lao sibawa siruntu Aléna.
23:4 Na ri Aléna upangolo iyaé parakaraku, polé ri témukku tassiyai ada-ada pangéwaé.
23:5 Macinnaka missengngi aga Napowada matu, sibawa pékkugiwi mabbéré pappébali.
23:6 Aga napalancara'iga matu akuwasan-Na lao ri iyya? Dé'! Pasti dé' naéngkalingai matu ada-adakku.
23:7 Dé' upasala sibawa mulléi méwaiwi aléku ri yolo-Na, naripannesaka matu leppe *naripannessaka matu leppe, iyaré'ga na amanna sining ha'ku.* untu' mannennungeng.
23:8-9 Usappai Allataala ri alau, yajang, yattang, manorang, iyakiya kégi-kégi dé'i gaga Allataala; sibawa dé' uwulléi runtu'i.
23:10 Iyakiya Naissengngi sininna lalekku makkuwatoro tungke' jongkaku. Rékko riojika pada-pada ulawengngé, pabuttiwi matu makkedaé mapaccingngi atikku.
23:11 Mapatoka lao ri Aléna sibawa matinulu, dé' naengka uléssé polé ri laleng iya Napattentué.
23:12 Sining paréntana Allataala tuli uturusiwi, élo-Na uwaccowéri, sibawa tenniya cinnaku muto.
23:13 Iyaro Allataala dé' natappinra; dé'gaga iya mullééngngi méwai. Napogau'i aga iya Naéloriyé.
23:14 Napajoppai matu rancana-Na untu' aléku, sibawa maéga mupa rancana-Na ri lainnaéro.
23:15 Nasaba métaui ri Aléna, ténréka; pédé upikkiri manengngiro, pédé métauka.
23:16-17 Iya Pommakuwasaé mancuru'i sininna abaraningekku. Métauka nasaba Allataala, na tenniya nasaba pettang kape, namuni iyaro pettangngé mattulilingika, sibawa sampoi rupakku.