Ayub 17

17:1 Macawé'ni ajjalekku, mawé'ni pettu nappase'ku; banna kuburu iya monroé untu' aléku.
17:2 Napancajika tauwé akkéllé-kéllékeng; uwitai pékkugi mennang massindiri.
17:3 Iyya'é malempuka, oh Allaataala. Ateppe'no ri iyya! nigapi mulléi sokongngi ada-adakku?
17:4 Mutongkoi atinna mennang angkanna dé' napahangngi; aja' narapii mennang patunru'ka.
17:5 Manuru warékkadaé, niga mappissengengngi sellaona untu' asaronna, ana'-ana'na muto tarimai matu pamale'é. *niga ... pamale'é; iyaré'ga niga panréi sellao-sellaona, ana'-ana' rialéna alupurengngi matu.*
17:6 Risindiri'na makkekkuwangngé sibawa warékkadaéro; poléi mennang untu' mamméccuiwi rupakku.
17:7 Massalawu matakku nasaba asarang; sininna tubukku makojo maddékéréké.
17:8 Tasséleng sibawa hérang tau malempué; tau dé'é napasala, naangga'ka dé' nakképuwang.
17:9 Tau iya makessingngé sibawa iya dé'é napasala, pédé mateppe'i ri cara atuwonna naéloriwi Allataala.
17:10 Iyakiya akkalarapanna lao manekko mai, dé' muwi séddi tau mapanré upoléi matu.
17:11 Labe'ni esso-essoku, dé'na najaji sininna rancanaku; teddéng toni sininna nawa-nawa atikku.
17:12 Iyakiya makkedai sahaba-sahaba'ku, 'Iyaro wennié lakesso sibawa tajangngé mawé'ni lettu.' Iyakiya uwisseng ri laleng atikku makkedaé tette'i mapettang keadaakku.
17:13 Banna linona tau maté ritu uwamménasai, kuwana'ro matinro matu ri laleng pettangngé.
17:14 Kuburu'ku Uwasengngi "Ambo'ku", sibawa sining lati manrééngngi tubukku uteppu "Indo'" sibawa "Ana'darakku".
17:15 Kégani paddennuwakku; niga mitai engkana asennangeng ri aléku?
17:16 Rékko nonnoka *Séddi bettuwang mariyoloé: iyya.* ri linona tau maté, dé'na uwappunnaina paddennuwang."