Amsal 6

6:1 Ana'ku, naullé engka naengka muwajjanci lao riséddié tau untu' tanggungngi inrenna.
6:2 Naweddissa jaji nala siyo polé ri ada-adanna sibawa tajjebba polé ri jancimmu muto.
6:3 Rékko tongengngi makkuwaro, ana'ku, engkano ri laleng akuwasanna tauwéro. Iyakiya iyanaé carana mulléi leppe: asitta'no lao ri tauwéro; éllauwi sibawa masero kuwammengngi namaélo paleppe'ko.
6:4 Aja' mulao matinro riyolo, sibawa aja' muwappésau.
6:5 Paleppe'i alému polé ri siyo-siyoéro pada-pada manu'-manu'é iyaré'ga jongaé paleppe'i aléna polé ri paddengngengngé.
6:6 Tau iya makuttué harusu'i pénessaiwi cara atuwonna béré-béré sibawa magguru polé ri aléna.
6:7 Iya manenna dé' nappunnai pamimping, dé' nappunnai panguwasa iyaré'ga panganrowang,
6:8 iyakiya ri wettu éngngalanna mupa paddeppungengngi mennang bokong untu' wettu aperisengngé.
6:9 Gangka kégi iyaro tau kuttué maélo matinro? Uppannapa namaélo moto?
6:10 Tudangngi malleppe lima untu' mappésau, sibawa makkedai, "Ah, matinroka cinampe, cakkarudduka."
6:11 Iyakiya ri wettu matinrona, nakennai akurangeng sibawa akasiyasing iya polé pada-pada parampo massenjataé.
6:12 Tau majaé sibawa makurang ajara'é mabbelléi kégi-kégi.
6:13 Macculé matai sibawa mébbu kodé untu' pabengnguwang.
6:14 Pikkiranna iya makebbongngé pennoi sibawa rancana maja sibawa paompo assasang kégi-kégi.
6:15 Iya manennaro nassabariwi matu nakennai acilakang aléna tennasenna-senna, naancuru sisenna.
6:16-19 Engka pitu parakara iya nacéccé PUWANGNGE sibawa dé' namakkullé Naleppessang: Kédo-kédo iya matempoé, tému iya mabbellé, lima iya mpunoéngngi tau iya dé'é napasala, ota' iya rancanaéngngi gau'-gau' majaé, ajé iya mapperi-periyé mattuju ri jaé, sabbi iya matteru-terué mabbellé, sibawa tau iya paompoé assimusureng ri yelle'na silaonna.
6:20 Ana'ku, pogau'i aga napparéntang ambo'mu, sibawa aja' muwallupaiwi pangaja-pangajana indo'mu.
6:21 Tuli éngngerangngi ada-adanna mennang sibawa taroi iyaro ri laleng atimmu.
6:22 Sining pappagguruwanna mennang napimpikko matu ri laleng allalengengngé, najagaiko ri wennié, sibawa mabbéréi panunju ri iko wettummu moto.
6:23 Panunju-panunju'na tomatowammu padai lampu iya macakkaé; pakkamparenna mennang najellokekko cara atuwong iya makessingngé.
6:24 Nanallalengiwi ripabélaiko polé risining makkunrai bettaé, sibawa polé ri pappalécé-pappalécé mamosona bainéna tau laingngé.
6:25 Aja' murigoda ri agellorenna mennang, aja' mutattaré ri matanna mennang iya mappalécé.
6:26 Cakkuribangngé weddingngi riséwa singngangke sipenné inanré, iyakiya malaweng sibawa bainéna tau laingngé harusu'i riwaja sibawa nyawa. *Cakkuribangngé ... nyawa iyaré'ga: Iya risappaé ri cakkuribangngé banna sipenné inanré, iyakiya iya nalellungngé makkunrai iya puraé mallakkai iyanaritu nyawa iya mangke'é.*
6:27 Naulléga tauwé riwa api tennanréi wajunna?
6:28 Naulléga tauwé léjja'i bara apié tennanréi ajéna?
6:29 Iyaro pada-padai bahayana lusérengngi bainéna tau laingngé. Niga pogau'i dé' matu naleppe polé ri pahukkungengngé.
6:30 Rékko ménnauwi tauwé inanré, namuni nasaba malupui, ripakatunai matu.
6:31 Sibawa rékko ritikkengngi harusu'i nawaja paimeng leppi wékkapitu; untu' iyaro harusu'i ateddéngeng sininna waramparanna.
6:32 Iyakiya pékkugiwi sibawa worowané iya malawengngé? Nasolangiwi aléna muto! Madonggo senna'i!
6:33 Risissai matu sibawa riyéllé-kéllé. Majai matu asenna untu' mannennungeng.
6:34 Saba', nasibawang pangkaukengngéro lakkainna iyaro makkunraié mancaji mangémpurui, angkanna malluwa-luwa caina. Narékko makkabale'i, dé' matu nappunnai paressé babuwa.
6:35 Dé' nawedding ripalécé sibawa dowi; muwi hadiya singngéga aga dé'to naulléi pasoroi caina.