Amsal 1

1:1 Iyanaé pangaja-pangaja polé ri Salomo ana' worowanéna Daud, arunna Israélié.
1:2 Akkattana iyanaritu untu' tulungngi tauwé pékkugi missengngi mancaji mapanré, sibawa missengngi atorenna atuwongngé enrengngé mulléi pahangngi warékkada-warékkada iya tampu'é bettuwang iya malamungngé.
1:3 Iyaé sining pangajaé nappagguruwangngi pékkugi tauwé naulléi tuwo sibawa mapanré, malempu, adélé sibawa tongeng.
1:4 Tau iya dé'é namappangalamang napaggurui angkanna mappunnai pikkirang iya matarengngé, sibawa tau maloloé napaggurui mancaji tau iya maccaé sibawa naulléi mappikkiri secara tau battowa.
1:5 Nasibawang iyaé sining pangajaé tattamba toni matu pangissengenna tau mapanré, sibawa tau iya engkaénna aggurunna lolongengngi matu pappimping.
1:6 Nanallalengiwi naulléi mennang wellungiwi bettuwanna iya tassubbué ri laleng pasengngé sibawa pahangngi ada-adanna tau mapanré enrengngé parakara-parakara iya napangoloé mennang.
1:7 Untu' lolongengngi pangissengeng tongengngé, lebbi riyolo harusu'i tauwé mappunnai perasaang mappakalebbi sibawa métau lao ri PUWANGNGE. Tau madonggoé dé' naangke'i pangissengengngé sibawa dé' namaélo ripagguru.
1:8 Puriyatiwi aga iya napowadaé ambo' indo'mu lao ri iko, ana'ku,
1:9 saba' sining pappagguruwanna mennang natambaiwi akkaleng makessimmu pada-pada bélo-bélo ulué sibawa ranté pagelloriyéngngi tappamu.
1:10 Rékko napalécéko tau madosaé, ana'ku, aja' muwaccowériwi pappalécéna mennang.
1:11 Ebara'na makkedai mennang, "Ayo, laono mai tasappa tau sibawa taborongngi. Untu' assennas-sennangeng, laono mai tagasai tau iya dé'é napasala.
1:12 Tuwoi mennang makkekkuwangngé masennang sibawa madising, iyakiya matti mancajiwi matu pada-pada tau iya sitengnga maté.
1:13 Taalai barab-baranna mennang iya mangke'é, kuwammengngi napenno bolata sibawa barang rampasa.
1:14 Accowéno mai! Ritawa ratapi wassélé énnaunna!"
1:15 Aja' muwaccowé sibawa sining tau makkuwaéro, ana'ku! Abélaiwi mennang.
1:16 Dé' naulléi mennang monro mammekko rékko dé'pa napogau'i majaé. Macinnai mennang mapperi-peri pauno.
1:17 Sedangkang muwi manu'-manu'é dé' namaélo muttama ri laleng jala iya ripallebba'é ri yolona matanna,
1:18 iyakiya iyaro sining tau majaé mala pasangngi siyo untu' aléna muto -- siyo iya cilakaéngngi matu mennang.
1:19 Mémeng, tau iya sappaé dallé sibawa makkégunang ateddekeng nawajai matu sibawa nyawana muto.
1:20 Engkalingai! Mangobbii pangissengengngé risining lalengngé sibawa gora-gora risining lapangangngé!
1:21 Mangobbii ri pintu-pintu gerbangngé sibawa ri onrong-ngonrong iya marowaé:
1:22 "Eh sining tau donggoé! Gangka kégiko maélo tette makkuwaro? Uppanna narapi wettunna mappésauko pakariyawai pangissengengngé sibawa sampéyangngi pappagguruwangngé?
1:23 Engkalingaka rékko uwamparekko, naupannessangekko matu lise atimmu sibawa upagguruwakko pangissengekku.
1:24 Purano uwobbi, iyakiya massampéyakko sibawa dé' mumaélo bati-batiwi.
1:25 Sininna pangajaku dé' mubati-batiwi sibawa pakkamparekku musampéyangngi.
1:26 Rimakkuwannanaro, rékko macilakako, ucawa-cawaiko matu. Rékko métauko, uwéllé-kéllé'ko matu.
1:27 Ya, uwéllé-kéllé'ko matu rékko manennekko sibawa manrasa-rasa nasaba nageppako abala iya polé pada-pada anginrajaé.
1:28 Iyaro wettué muwobbika matu, iyakiya dé' matu umetté. Musappaka matu kégi-kégi iyakiya dé' matu muruntu'ka.
1:29 Pada-padako tau iya dé'é naengka napojiwi lolongeng pangissengeng, sibawa bata-bata turusiwi PUWANGNGE.
1:30 Dé' naengka mumaélo tarimai pangaja-pangajaku iyaré'ga puriyatiwi pakkampareng-pakkamparekku.
1:31 Rimakkuwannanaro, mupéneddingiwi matu addimonrinna sining pangkaukemmu sibawa sining rancanamu iya majaé.
1:32 Tau dé'é namappangalamang matéi matu nasaba dé' najampangika, sibawa tau donggoé ancuru'i matu nasaba dé' nabati-batika.
1:33 Iyakiya tau iya méngkalingaékka ripiyarai matu. Tuwoi sibawa amang enrengngé dé' naparellu métau."